Poesis Latina A Florindo Di Monaco Scripta
Latin Poetry by Florindo Di Monaco

Terrarum Mirabilissima Decem

• 1. Urbs "Bangkok" vulgo nuncupata
• 2. Novum Eboracum (New York)
• 3. Horti urbis japonicae cui nomen "Kyoto"
• 4. Insulae Tahitianae (Tahiti)
• 5. Regia Araba quae "Alhambra" dicitur (Granada, Alhambra)
• 6.Insula Indonesiana "Bali" appellata
• 7. Venetiae
• 8. Saltus aquarum cui nomen "Niagara"
• 9. Cacumina Andina "Alturas de Macchu Picchu" dicta
• 10. Specus Postumienses (Postumia in Jugoslavia)

1. Urbs "Bangkok" vulgo nuncupata

	Aureis templis locuples ad alta quae levant pinnas oriente tinctas et smaragdorum reserans referta splendida tecta,
5	ecce Bankokum placidi Menami angelorum lar madefactus undis caeruleis mirans in aquis scapharum sistere turbam.

2. Novum Eboracum (New York)

	Sustinens taedam rutilam puella, liberae terrae suboles, salutat iam procul naves saturas petentes litora pacis.
5	Hic manus stringit nigra fulvam et albam, exprimit concors studium laboris gens et excelsi vario penates nubila mulcent.

3. Horti urbis japonicae cui nomen "Kyoto"

	Candidi flores cerasi propinquo vere consternunt nive rura densa, azalearum varium tapete prata colorat.
5	En lacus praebet speculum Kyoti leve castello foliisque crassis, hic canunt alba volucres sub umbra magnoliarum.

4. Insulae Tahitianae (Tahiti)

	Iam maris parent vitrei colores atque arenarum crocinum aequor instat, fulva palmarum series comatae litora velant.
5	Lucidae stella tenebrae micanti flaminis donant tepidum susurrum, coccinis volgo redolent beatae orchibus orae.

5. Regia Araba quae "Alhambra" dicitur (Granada, Alhambra)

	Vesperascit. Te lavat alba luna, flos rubens collis, rosa picta saxo. Nunc columnarum simulacra nectunt murmura fontis.
5	Lympha de labris salit. Aura frondes comit occasu calido. Remotae eminent turres ut aves nigrantes astrifera umbra.

6.Insula Indonesiana "Bali" appellata

	Tu serens undam Thetidis furori pace Vulcani liquidae statuta, caerulum gilvo prasino rubrumque, insula dulcis,
5	tu rates crebras capiens benigna, anxias curis releva medullas saltu et incessu crotalistriarum temperieque.

7. Venetiae

	Fluctuant aedes procul in lacuna. Hic viae nullus rumor et vehicli. Gurgitum mitis resonat favella caeruleorum.
5	Templa radentes per aquas phaseli usque labuntur nitidas fretorum, lenis amplexu fluvii superba limina gaudent.

8. Saltus aquarum cui nomen "Niagara"

	Murmur augescit. Fragor hic aquarum per nemus fodit laricum meatus, spuma concurrens niveo vapore desilit ampla.
5	Silva pinorum nivea quiete orat et fines fluvius polusque conserunt. Sensus hominis recumbunt turbine rapti.

9. Cacumina Andina "Alturas de Macchu Picchu" dicta

	Nubium candens prohibet corona astra mirari. Silet omne tempus. Caelites mutis precibus sequuntur edita saxa.
5	Quo facultates solii supremi, magna quo fugit populi potestas? Instat arcanum pavidis fugacis cordibus aevi.

10. Specus Postumienses (Postumia in Jugoslavia)

	Est Avernus. Lux tacuit. Cavernae uvida manant lapides querella, temporis stillas paries tuetur rore cadente.
5	Umbra mortales rapiens profunda sceptra Plutonis tenet ipsa duri noctis et claudit spatia universae amphitheatrum.