Poesis Latina A Stephano Coombe scripta
Latin Poetry by Stephen Coombs

Carmina numeris Horatianis confecta

• Carmen Matutinum
• Carmen Athenis Peregrinati
• Carminis Scholae upsalensis Sanctae Catharinae paraphrasis latina
• Traductio poematis A. E. Housmanii
• Traductio poematis Stephani Georgii (Stefan George)
• Salutatio natalicia ad heraldicum illustrem versibus mittenda
• Carmen varangianum

Carmen Matutinum

	Quam nunc mane polus specie rus vincit amicum   micansque limen Protei! Serva Iovis furtum fateatur apertum et inane,   quae cum neglexerat diu
5	purgare aether hebes, terere, ornare, integere auro,   morosa soli condita, prosiluit subito de languore invida tristi   auferre honores exteros. Lumina caerulea et roseas Aurora superne
10	insulsa praetendit genas, quamquam ibidem sciat esse alienos quisque colores,   tuam venustatem geri. Ut possim caelo faciei vivere amatae   et esuritione ovans
15	palpare his labiis, regio formosa, tuarum   stramen comarum sericum aut tenuem rorem de levi fronte perustus   siti beata lambere! Est tamen in nubes aditus vel in aera nullus,
20	desiderare futtile. Quomodo fit memini matutinum ordine tempus   meridies, meridies vesper, vesper nox: nequaquam dicimus horas   nos fallere omnes singulas:
25	ver, aestas vertunt autumnus hiemsque vicissim:   menses sequuntur invicem: fingitur inconstans spatiis brevioribus annus,   aetate longa pervicax. Sic naturae tu tibimetque decenter oboedis:
30	fraudem fidemque praeteris.

Carmen Athenis Peregrinati

	Flavescens folium Boreas movet aureumque mittet   praeceps avarus mox luto madere: tangit et Autumnus vitam mihi, namque dissipantur   canae comae iam singulis diebus.
5	Vivo non senior me mortue, nonne somniabas,   honeste Flacce, virginis Minervae Acropolin grandem Propylaeaque Martiumque Collem   doctamque pubis confluentis urbem? Oxonium potero cras visere si volam, superbum
10	meae iuventae culmen impolitae: te revenire deus vetuit tamen inclitas Athenas   Stoa loquaces rite cum Lyceo. Lumina sim tua, mens tua sim, tua lingua gustet ore:   tecum pererrem semitas perennes:
15	quod didicisti tunc discam modo naribus reductum   inter ruinas curruumque bellum. Gaudia longa calor iuvenilia traxerit moratus:   Octobris hora quis manere nolit hic sub olivis, hic ubi pomifer hospitale ramus
20	umbret sedile simplicis tabernae? Thespidos adpellent hanc nomine de via propinqua:   te rufa feles suaviter salutet: hic stridor sileat: volucris canat una: rus putares:   resina vinum condiat salubris:
25	sepia vel xiphias det prandia. Suspicor remotum   hic a cathedris te bibisse vera: hic Epicuro te sapientius imbuit sapore:   hic sempiterna est sensa pulcritudo.

Carminis Scholae upsalensis Sanctae Catharinae paraphrasis latina

	De veritate nascitur felicitas:   gaudia qui cupiunt, Telemache, verum postulent: hortetur ardens haec magister in schola   discipulusque vigil praescriptioni pareat.
5	Chara ex alethou norma vitae sit tibi;   quomodo, cur, age, quid in omne cures discere: docte rogando liberatur spiritus   atque hilarant animam elucituri nuntii. Dies teruntur a pigris in taedio,
10	dat tamen assiduis annos beatos dignum opus: labore consectare tu scientiam:   laetificatus eris: hoc redde praeceptum tuum.

Traductio poematis A. E. Housmanii

	Vitas amatis, cara animantia? Aures apertae sunt sapientiae?   Hic ecce cultellus ministri     quem modici pretii videtis,
5	sed quo meum cor si modo perforo tunc omne caelum desuper incidet   sedesque telluris liquescent     vosque peribitis universa.

Traductio poematis Stephani Georgii (Stefan George)

	Ad larem venit puer marisque venti flant adhuc capillis:   ante passus est metum: nunc membra iuveni gaudio vacillant.
5	Spuma salsa adhuc genas, altas ab acri solis igne saevi   barbarisque odoribus, rubore fulvas conciet flagrante.   Vultus illius gravis
10	silet quod unquam non sciam fuisse:   tristis umbra cernitur de vere brumam nostram in ore nacto.   Gemma sic late patet ut in pudorem paene lapsus adsum,
15	osculum nolens rapi quod iam tributum est alteri libenter.   Bracchio circumdedi germen quod est flos factum et o! adultum   praeter orbitas meas,
20	meum sed a me funditus remotum.

Salutatio natalicia ad heraldicum illustrem versibus mittenda

	Huc non mala decus silvestria fert, neque acerbis   utitur hic bacis, sed adornant punica mala locum quo carmen dicit honorem:   namque colore videntur pulchra et
5	digna sapore legi dulces venerantibus artes   praestat Ioannes quibus ille filius Olai Raneceus incola Lommae,   armiger et pater armigerorum: permulti debent populares cui sua signa
10	cum galea scuto manifesta: quem nonaginta natum celebraverit annos   Magnus aprilibus incola nonis Taebyiae, saeclis viginti vere salutis   sancte novo Luca quater auctis,
15	filius Olai Becmarcus. Plura fuissent   poma gulae si corvus egeret!

Carmen varangianum

	Martyres sancti, Theodore miles, flos Ioannes iuvenum, varangi sponte russorum tuiti salutem     sanguine fuso!
5	Bosphori conscripte parens ad oras, mystico Christi fluvio lavatus quae Dei donum merito petemus     nomine dones. Fortis a forti generate fili
10	candida iuncta sine labe pulcro corpori splendens anima, rogamus     nos bene tractes. Nordicae stirpi memores favete pristini saltus paludisque notae
15	ac maris glauci peregre vehentis     agmina crebra. Urbs parum secura Chioviae vos, vos ager natalis utrimque laudant, hospes haec fallax, patiens origo
20	hic atavorum. Principes olim populi senesque victimam castum iuvenem deorum sorte legerunt: genitor negasti     fas ita cerni.
25	"Non deos" inquis "sed habetis aris ligna quae fient aliquando pulvis. Ligna num potant vel edunt labrisve     dicere possunt? Dis manu sculptis minime iuvamur:
30	unus est summus Deus ille simplex quem colunt graeci precibus decoris     pro cruce cantis. Ille tellurem viridem creavit, aequor et caelum dedit atque in orbes
35	solis et lunae geminae levavit     lumina clara. Amplius fructu paradisus omni plenus acquisivit uti coronam mentibus celsis hominum potentem
40	semine prolem. Est homo terrena Dei figura. Filium nunquam mihi corde carum traderem larvis stupidus malignis     daemonibusque."
45	Raptui miles validus resistis, ad latus pugnas puer acer aeque: hoc nequit taetrum scelus impetrare     saeva caterva: sed super scalas modo maenianis
50	stantibus vobis quatiunt columnas arma sub vestris pedibus domusque     pars ruit intro. Per dolum vitae pereunt iniquum: caelites vitas capitis perennes
55	gratia Christi: moritura proles     firma sequatur. Vindices eventa diu neglecti mortis usurpemus inulta vestrae: iure reddamur melius retentae
60	religioni. Impleat fratres Theodore fides, spes Ioannes, neque desit unquam caritas: gentem penes orthodoxos     ferte superne.